صفى قلبك

السلام عليكم اصدقائى وزوار مدونتى الاعزاء

تدوينتى اليوم على برنامج مسموع فى القناة الشبابية ممكن معضمكم يعرفوة بس حبيت نحكى عنا

البرنامج هوا صفى قلبك

ماجمل هدا الاسم

الى شدنى لى البرنامج هوا ان فكرة البرنامج جميلة

ان لو فى اى سوء تفاهم بين شخصين يتصل واحد منهم الافضل اكيد ويقدم اعتدارة قدام ملاين الناس لى الشخص الى غلط فى حقا

يعنى هدا البرنامج يعطى فرصة لى المخطى ان يعتدر عن خطا الى دارة ومن غير دكر الخطا

هدا البرنامج تقدم فية الاعلامية سمر بوحلفاية ويداع على الهواء يوم التلاتاء من كل اسبوع

بس لاحضت ان المتصلين بى هدا البرنامج يطلعو عن هدف البرنامج الاساسى وهوا الاصلاح بين الناس الى زعلانة من بعضها

على سبيل المتال فى مرة اتصل اخ من مصر الشقيقة وشكلا يبى يتزوج بى فتاة ليبية بس اهل الفتاة رفضوة

بس هوا ماتقبل الرفض واتصل بى البرنامج ودكر اسم الفتاة وعائلتها وحنى عارفين مجتمعنا الليبى معضم الناس تعرف بعضها

وسبب مشاكل لى البنت واهلها بى الطريقة هادى

وفى هلبا مشاكل تعرض على الهواء تسبب فى تعقيدة وليس حلها

وهدا مش خطا معدين البرنامج بس خطا الناس الى مش فاهمة فكرة البرنامج

من راى ان لو البرنامج يتسجل تم يداع افضل من ان يسبب مشاكل لى الناس

وجهة نضر حبيت نحكيها فى عالمى الالكترونى الصغير

واخيرا نبى نشكر الاعلامية سمر بوحلفاية ومخرج ومعدين البرنامج واكيد ان الاعمال بى النيات

وان شاء اللة يجازيهم على قد نيتهم

سلام