حاجة غريبة

طفلة تقـرا

سمحة شقرا

اتقول غزاله

لا تعرف في الدنيا حيرة

لا تكديـره

اتقول اتعيش

فـ احسن حاله

.

.

.

وفي يوم من ليام

في استراحه

فيه شي صاب احساسها

غابت عليها الراحــه

وين ما انقطع امداسها

.

.

.

.

قالت لبوها دامعه

بعد ما تكدر حالها

والأم كانت سامعه

والحال شاغل بالها

.

.

.

.

امداسي انقطع يا بوي

هللي زمان شريته

كعبه نصل يابوي

في المدرسة وما القيته

.

.

.

.

واطى الراجل راسه

المسكين جاته ثقيله

حست البنت احساسه

وعازته وقلة الحيله

.

.

.

.

قالت:

نا عارفة يابوي

إنّ ظروفك صعبه

تبيع لعبتي يابوي

لو كان عندي لعبه

بكرة نكبربكرة نقرا

بكرة تبقى العازة ذكرى

.

.

.

.

لكن زعمه

كيف بنقرا

وكيف نفهم درسي وعنوانه

وكيف نمشي لمدرستي ونقرا

انخاف ايقولولي حفيانه

.

.

.

.

وفي المدرسة قالولنا

اللي ما تجي في امداس

ما نقرّوها

اللي ما تجي في امداس

ما نبّوها

.

.

.

.

وقالوا

ابنادم

قيمته في امداسه

يامن امداسه جديد

يامن تعلى راسه.

.

.

.

.

وقالولنــا

الحفيان كيف ايتعلم

العلـم يبي امـداس

الحفيان كيف يتكلم

الحفيان مش مالناس.

.

.

.

.

وبلا امداس قالوا

ما تصير كتيبـه

وقالولنا يابـوي

ابنادم حبيبه جيبه

حاجة غريبه!!!.

.

.

.

.

كــم مـن كـلام ينقـــال؟! ومن كلمات قولتها صعيبـه؟!

وكم من حال يغني عـ السؤال؟! ومن حاجات في الدنيا غريبه؟

......

......

من روائع الشاعر محمد اميمة